حد فهم حاجة !! ..

تعرف  لما  تكتب  حاجة  من  جوا  قلبك  بجد  فـ وقت  حسيت  فيه  بإحساس  معين  إتملِككـ  ويعدي  عليك  الوقت  وتنسى  الكلمين  دول  وبعدها  يمُر عليك  أكتر  من  يجي  ميلون  إحساس  تانِ  وبرضو  فـ كُل  إحساس  تطلعُه  فـ كلمتين  تكِتبُهم  وفـ الآخر  تنساهم عارف  أحلى  ما  فـ دا  كُله  إيه ؟؟ أنه  وقت  ما يجي  حد  يقرأ  كلامك  حتى  لو  بعد  ألف  سنة  ويكون  إحساسُه  قريب  من  الكلام  دا  بجد  هيلاقِ  إنك  وفرت  كتير  عليه  وطلَعت  من  جواه  حاجات  كانت  يمكن  من  الصعب  عليه  يعّبر  عنها حد  فهم  حاجة !! ..

فقد كان يحلُم ويتمنى ..

كان يحكي لي ويخبرني عنها ويقول لي أنه فرَح كثيراً لما تجملت بالنقاب كان هذا اليوم من أسعد أيام حياته وكل يوم يكلمني كثيراً عنها ويقول لي عنها الكثير والكثير يوماً إنها رفضت أن تخرج معه وحدها دون مُحرم ويوماً قبلت يدا ابويه ويوماً حنت على أخ وته البنات كل يوم كانت تكبُر بنظره أكثر وأكثر ومن أسعد أيامه ايضاً عندما طلبت منه وأخبرته أنها تُريد أن يكون فرحها إسلامياً وشكت له من أهلها وأصدقائها لانهم يعارضونها فـ ذلك فقبض على يديها وقال لها أنا معك وهذا يكفيكي قالت له أنه تُريد أن تكُن له وحده ولا تُريد أن يراها ولا ينظُر لها أحدِ غيره أخبرته أنها حافظت على نفسها كثيراً من فتن الدنيا كي يصبح هو مالِكها الوحيد لا أن يكون قد شاركه غيره فيها قبل ذلك ولو بنظره أخبرني عنها لم تكُن يوماً بالمتشددة ولم يراها يوماً تُرغم أصدقائها على شئ كانت من بين أصدقائها من هي محجبة ومنهم من لم تتحجب إلى الآن ومنهم من هي على غير دينها قال لي كثيراً أنه قبل أن يلتقيها يحلُم بها كثيراً قبل أن يراها تمنى كل شئ فيها وعندما أكرمه الله ورأها تشبث بها كالطفل بأمه وأقسم على نفسه أنه لسوف يتقي الله فيها ما حيا هكذا كان يًحدثني علقي عنها وما زال يُحدثني كثيراً وكثيراً ويحلُم بكل هذا دون أن يحدُث شئ
فقد كان يحلُم ويتمنى ..

فضفضة ع الماشي ..

بئالي فترة كبيرة مكتبتش حاجة وبصراحة إيدي بتكُلني زي ما بيقولوا وكان نفسي أكتب وملقتش مناسبة أكتب فيها طول الفترة اللي فاتت بس من كام يوم كدا حصلي موقف خلاني أفكر أكتب حالوا بقى تتحملوني وخلاص

بُص يا صاحبي حاول ببداية أي علاقة مع أي إنسان كائناً من كان إنك بقدر المُستطاع حاول تتحكم بمشاعرك ومش كُل حاجة تيجي ببالك تعملها ولا أي إحساس تحسه تجاه الشخص دا تخرجة مرة وحدا مش لازم الحد دا يكون بنت تحبها أو العكس ممكن تجاه صاحب أو صاحبة ليكي تجاه أي علاقة من أي نوع فـ ناس وسطنا وقت ما بتحب أو تتعلق بحد بتُخلص له اوي فوق أي وصف وتحاول بشتئ الطُرق إنها تفرح الشخص دا من الآخر كدا بيبقى نفسه يجبله الدنيا هدية له ودا شئ مش وحش أبداً والعيب مش فينا ولا بأحاسيسنا تجاه الأشخاص دي العيب بيكون فـ الشخص اللي مبيقدرش دا أو بمعنى أصح أنه صحيح بيفرح بينا فترة وبيفرح بتصرفتنا دي وبيشكرنا كتير عليها ويفضل يمدّح فينا وللأسف دا لمجرد فترة مش أكتر ومع الأسف الناس دي بعد فترة مش هقولك بتزهق مننا بس أي حد جديد يشدها نحيته تنسى بثواني كُل اللي كان منك وممكن بالمرة تنساك ولا حتى تفرق معاهم !!

بيحصل يا فعلاً محدش يستغرب عارفين المشكلة دي أساسها إيه ؟؟ مشكلتها بتكمُن فـ البعض منا وبأكد ع البعض لأن مش كُل الناس تملُك الملَكة دي هي فـ ناس وقت ما بتحب أو تتعلق بحد بتتعلق به وبتعمل كل حاجة تفرحة حتى لو مكنش يعرفه كويس بيحاول هو نفسه يتخيل ايه ممكن يفرح الشخص دا وبيعمله وبيعمل تصرفات ممكن فيها يجي ع نفسه وصحتة عشان يفرح الشخص دا وهو بيعمل كل دا بيكون حاطط ببالة إن الشخص اللي بيعمل عشانه كُل دا حاسس باللي بيعمله ومقدره وبيتوقع كمان منه رُدود فعله كمان قبل ما تحصل وهنا بقى الصدمة الي بتفوقنا
” إن الشخص اللي عملنا عشانه كُل دا مأخدتش باله أو مش بباله كُل اللي بنعمله وكُل توقعتنا له تروح فـ الهواء والشخص دا ولا بيعمل ولا هيعمل أي حاجة عشانا لأنه هو بالأساس مش زينا ولا عمره هيحس بالأحاسيس والحاجات اللي جوانا ..

بس خلاص خصلت فضفضة واللي يفهم أكيد بيوم مرّ بحاجة زي كدا واللي مش فهم يحاول مرة وإتنين يقرأ الكلام دا تاني وصدقني اللي بيُخرج من القلب بيوصل للقلب ع طول .. 

عارف إيه معنى تِحبك بصمت وصبر !! ..

يعني تفضل طول الليل والنهار صاحية تطمن عليك من بعيد لبعيد عشان متحسش بيها يعني فـ كُل سجدة بتصليها تفضل تدعي ربنا إنك تكون ليها يعني لو تحب حاجة هي تحبها من غير ما تفكر ودا مش بئديها يعني تفضل طول الوقت تقرأ فـ كلامك وتحفظه ولانتاش داري بيها يعني تفضل تُنشر فـ حسناتك الجارية عشان تهديلك ثوابهم ومش مستنيه تقول شكراً ليها يعني إنك تبقى ديماً سبب بوجعها ومنتاش حاسس بيها وبرغم كُل دا تفضل أغلى أمانيها يعني تفضل تحلم وتحلم بحياتها معاك ووتخطط لكُل حاجة ويا عالم ممكن متكونش ليها ..

عارف هي قد ايه باقية عليك وشرياك !! ..

عارف هي قد ايه باقية عليك وشرياك !! .. ياما قولت كلام كتير جرحها وباتِت و دموعها علي خدها ومجاولتش حتى تحسسك ولو بوجودها
ياما كدبت وعِملِت نفسها مصدّقة وأوقات مش واخده بالها عشان إنت أغلى عليها من نفسها
أوقات كتير غلطت وأسئت الظن بيها ورجعتلها من تاني تعتذر لِقيتها حطيت إيدها على بوقك عشان متكملش ومتنكِسرش قُدمها
نسيتها كتير وياما تجاهلت وجودها وبرغم كُل دا إنت مغبتش عن بالها وقلبها
غفرتلك كُل ذلاتك وأخطائك اللي تعرفها واللي حتى متعرفهاش كُل دا عشان شرياك
أوقات كتير كانت بدور على البسمة وتشتريها عشان ترسمها على شفايفك وقت حُزنك وكالعادة تفرح وتنساها وهي مكملة فـ إخلاصها ليك ومش منتظرة منك حاجة
نِسيتلك وهتنسالك كُل هفواتك وهتفضل شيلاك بقلبها أجمل ذكرى لو مهما الدُنيا فرقت بيوم بينكم ..

إحساسها بيه فوق كُل وصف وخوفها عليه مشوفتهوش !! ..

بتبقى لسه يا دوب صاحية وتلاقيها جِريت فتحت الفيس عشان تشوف إذا كان نزل بوست جديد على صفحتة منُه تطمن عليه تفرح أوي لو يوم لقيته فـ بوست فرحان مش محتاجة تعرف إيه السبب ولا حتى عندها فضول ولا فكرت بيوم و إتمنت تكون هي سبب الفرحة كُل همها هو يفرح والسلام وياااه لو يوم حسيت أو قريت بوست حزين منه متتخيلش حالتها شكلها ايه وقتها أبسطها تصوم عن الأكل ولو بإيدها تروح تطمن عليه وتعرف إيه اللي بيه وجواه برغم إنه ممكن ميكونش واخد باله منها !! ..

إحساسها بيه فوق كُل وصف وخوفها عليه مشوفتهوش !! ..

عارف لو يوم يحس بيها ولا ياخد باله من وجودها حوليه ولا هي ممكن تعمل ولا عملت عشانه إيه .. صدقّني هتلاقيه يندم ويتحسر على كُل لحظة عشاها من غيرها حتى لو مكانش بإديه ..

فـ يوم هتصحى هتلاقيها فُرجتّ من وسع ..

فـ يوم هتصحى هتلاقيها فُرجتّ من وسع .. واللي كُنت خايف منه يتبدل وتبقى الدُنيا زي العسل
واللي كُنت بتتمناه وتحلم بيه تلاقيه حصل
واللي كُنت مستني رُجوعه هتفتح بابك تلاقيه وصل
واللي كان زعلان منك ضحكلك وإنبسط
واللي كان فـ قلبك كان لازم يُخرج عشان يصفى ويتغسل
واللي نِسيك وهجرك من تاني يوصل حبلُه اللي إنفصل ..

عارف إيه معني إنك تدخُل الجيش ..

عارف إيه معني إنك تدخُل الجيش
يعني كدا فجاءه تلاقي نفسك مجرد ضيف علي بيتكم من وقت للتاني
عارف إيه معني إنك تدخُل الجيش
يعني تلاقي أكل الوالدة يتحول لأكل ميري يقطع قلبك
عارف إيه معني إنك تدخُل الجيش
يعني تتخلى عن أحلامك مؤقتاً وتركونها علي الرف
عارف إيه معني إنك تدخُل الجيش
يعني تتنازل عن بطانيتك الحرير ببطانية صوف تقطع جلدك
عارف إيه معني إنك تدخُل الجيش
يعني تبقي هتموت وتطمن علي أهلك وحابيبك وتلاقي الموبايل عنك ممنوع
عارف إيه معني إنك تدخُل الجيش
يعني تنسي كل ملابسك اللي بتحبها لإنها ممنوعة عليك
عارف إيه معني إنك تدخُل الجيش
يعني تكون نايم وفجاءه تسمع صوت يقولك أجمع وغصب عنك تقوم من نومك مفزوع وتلبيه
عارف إيه معني إنك تدخُل الجيش
يعني واحد زيك في السن ويمكن أكبر منك أو حتي مستواه التعليمي أقل منك يتحكم فيك ويقولك أنا أقدميه ويطلع عينيك
عارف إيه معني إنك تدخُل الجيش
يعني في عز البرد اللي يموت تستحمى ميه ساقعة تلج ومع الأيام تتعود عليها وتبقي شئ عادي
عارف إيه معني إنك تدخُل الجيش
يعني يكون فرح صاحبك أو حد قريبك ومتقدرش تنزل تحضرُه
عارف إيه معني إنك تدخُل الجيش
يعني تفضل تسمع أسماء ومسميات غريبة " بيادة - قايش - بلدِ - ....... "
عارف إيه معني إنك تدخُل الجيش
يعني تيجي تقبض مرتبك وتوقف في طابور زي طوابير العيش بالساعات وبعد دا كله يقولك الضابط عدي عليا بوقت تاني معايا تليفون
عارف إيه معني إنك تدخُل الجيش
يعني تكون مجهز نفسك بإي لحظة تبات في الحبس
عارف إيه معني إنك تدخُل الجيش
يعني تكون تعبان ومش قادر تسند طولك وبرضو توقف خدمتك
عارف إيه معني إنك تدخُل الجيش
يعني يطلع عينك بالخدمات طول اليوم وتجي تنام وقت راحتك يجي واحد ينادي عليك ويقولك كلم الضابط وفي الآخر تلاقيه يقولك أشتريلي علبة سجاير
عارف إيه معني إنك تدخُل الجيش
يعني أنت الوحيد اللي تقدر تفهم كل كلامي وتعرف معناه 

عارف إيه معني إنك تدخُل الجيش

إنك مهما قولت فيه عن ظلمه وبأسه مش هتقدر تحصيها 

ومفيش شئ يهون عليك الأيام الصعبة دي غير قُربك من ربنا ورضاه عنك وإنك تكون على يقين وثقة من إن " مقامك حيثُ أقامك " وإن ربنا أختارك وحط بالمكان دا لأنه هو المكان الصح ليك فـ الوقت دا هتتعب وتتبهدل ويطلع عينك بس برضو هتتعلم حاجات كُنت صعب تتعلمها لو مدخلتش الجيش
" الصبر - التحمل - الرجولة - ضبط النفس - ................ "
وبرضو هتقابل شخصيات وتتعرف علي أصحاب صعب كنت تقابلهم غير جوا الجيش

من الآخر كدا الجيش ياما هيتعبك ويقرف فيك بس برضو هتتعلم حاجات ياما وتأثر فيك ..

حلهـــــــــــــا الرضا ..

BY .. WALID 

وكإنك أنــــــا ..To Be continued

أقولك حاجة وتصدقّني
تعرف كتير من غير ميعاد ألقاك قدامي
حتي كتير أحلامك تشبه أحلامي
ومش عارف ليه لما أنام بتسيطر علي كل كياني
ولو جيت أنطق بكلمة ألقاك قولتها قدامي
ولما أدعي لنفسي من غير ما أحس دعوتي ليك تغلب لساني
ولو مـريت بالشوارع بشوف صورتك بـ كل حد يعدي من قدامي
وأفكارنا وحاجات كتر ياما بتتشابه
وكإنك أنا.. وعجبـــــــــــــــــي .. مجــــــــــــرد خواطر ..


إليك كامل أحترامي يا من هو أنا..


To Be continued

لما تكون مهموم ..

لما تكون مهموم ..

قوم أتؤضى وصليِ ركعتين لله وأسجدله وأشكيله همومك
أستغفر ربنا كتير هتلاقي فرجُه قريب
دور علي أقرب حد لقلبك ورح له وفضفضله علي اللي جواك وخانقك
أقعد مع حد يضحكك ويخرجك من ضيقتك وينسيك همومك
أخرج أتمشي في أكتر مكان بتحبه وله ذكريات جميلة بقلبك
زور جمعية خيرية وساعد معاهم حتي ولو بجهدك
طلع صدقة من جيبك وإديها لحد بجد محتاجها تنفس عنه كربُه
إنزل تحت الدُش وخد حمام سخن وطول تحت الميه شويه
قلب في ألبوم صورك القديم وأسترجع ذكرياتك
دور علي طفل صغير وإلعب معاه ولو حتي في التراب
أجري وأعرق شوية وطلع كل الطاقة اللي جواك
أمسك ورقة وأكتب فيها كل حاجة مضيقاك وكل شئ بيدور ببالك وبعد ما تخلص أحرقها أو قطعها
أطفي النور ومدد ع السرير واقعد أسمع أكتر حد  أو تتر أنت بتحبه
فكر في حد بتحبه من قلبك وساب جواك معاني وذكريات جميلة
إمسك موبايلك وقلب فيه وسط أسماءك علي حد مقصر بحقه وأتصل بِه وحسسه إنك لسه فاكرُه


حاجات بسيطة قادرة تخرجنا من ضيقنا وهمنا حاول تجربها ..

وستظل مجـــــــــــــرد خواطــــــــــــــــــــر ..